من أبشع لحظات الحياة الانسانية , لحظة انتظار ام العريس ,بحاي اللحظة بالذات يتزايد شعور الإستياء من كونك فتاة!لأنه البنت حرفيا بتتمنى تموت بهاي اللحظة .
هاي اللحظة اللي كل حياتك و انجازاتك و عقلك بنحطوا فيها على جنب و بتبقى شكلك و قدرتك على الطبخ و إدارة المنزل هي اللي بتتحكم فيكي و بمصيرك! و أهم اشي ام العريس ,اللي بتلعب الدور الأول و الأخير بهاد المسلسل الدائم و يمكن العريس بس مش دايما!!!
الزواج مؤسسة لطيفة و فكرة تكوين أسرة و إنجاب أطفال و تربيتهم بطريقة جيدة و الاستقرار الإنساني فكرة رائعة , بس لما تتلخص كلها بساعة زيارة و فنجان قهوة ,هون المشكلة .
و الأحلى المكالمة الهاتفية الإستطلاعية اللي يستفسر فيها عن طولك و وزنك و لونك و لون عيونك وطول شعرك وكم مرة بتصلي باليوم و كمان شوي عن النظام الغذائي اللي ماشية عليه!و أسئلة عجيبة و غريبة كتيرة من مثيلاتها ,فالوحدة بتحتار اذا كانت هي بنت و لا حبة خضار!!!
تخيلوا معي مثلا لو ام العريس تغير نمطها المعتاد و تسأل اذا كنتي بتقرأي أو مثلا شو نوعية البرامج اللي بتحضريها على التلفزيون أو مثلا اذا ناوية تكملي ماستر و دكتورا! يا سلام شو خيالي واسع!
بالنهاية بتمنى من كل ام عريس انها تفصل بين رحلتها المعتادة الى سوق الخضار و رحلتها في البحث عن عروس مناسبة لإبنها (مناسبة إلها).
